خوفو بنى الهرم الأكبر حصالة تحفظ ثرواته
خد ثروات الشعب المصرى ينعم بيها بعد وفاته
وعمل غرفة دفن لنفسه نام فيها هو ومراته
خفرع بعده قام بنى هرمه زى ما طلبت منه حماته
حط الدهب الأصفر كله لولاده الصبيان وبناته
وأبوالهول ربطه على بابه صاحى ومبرم شنباته
لو واحد من الشعب يقرب يبقى دا آخر يوم فى حياته
بعد ما مات الريس خوفو منكاورع ابنه جانا
كان راجل طيب وكويس بنى وحكمنا بعدل وأمانة
هرماية على قد مقاسه غرفة نوم واحدة وجبانة
حط فلوسه فى بنك سويسرى خلاها كلها فى خزانة
واللى حكمنا بعد وفاته قال مش بانى أهرام تانى
اسمه كان منسرق الأول بعده جه منسرق الثانى
ثم حكمنا عسكرى تركى كان أصله واحد ألبانى
سجل مصر باسم العيلة أرض بتزرع ويا مبانى
بعدين قامت ثورة يوليو بحاجات حلوة قوى عجبانى
عمنا ناصر كتّر خيره رفع من شأنى وعلانى
كنت فقير غير أحوالى وعالجنى ببلاش وكسانى
بس ديموس وقراطس دى كلمة تشفى وتبدد أحزانى
لو طبقها كنا زمانا أحسن من الشعب الألمانى
هو إحنا خلاص كده متنا ولا رجعنا من الظلم نعانى
نفسى نصحى يوم من نومنا ونصرخ بالصوت الحيانى
الإثنين 26 أكتوبر - 7:24 من طرف 
