اسئله في الحب

السلام عليكم ورحمة الله وبركاته

بعد التحيه والسلامات احب اعرض عليكم الموضوع ده .. وعايزه اجابات صريحه

عايزه اعرف .. ايه ال يخلي الواحده تعجب بواحد ؟؟ والعكس !!!

شكله !!

طيب افرض ان شكله وسيم بس هو انسان تافه ومالوش شخصيه .. هتقدر تحبه لمجرد انه وسيم وشكله جميل ؟؟

شخصيته واخلاقـــه !!

هنا بقى افرض ان شكله مش وسيم ولا جميل بالمره .. بس اخلاقه عاليه وشخصيته قويه .. لدرجة انك ممكن تقول او تقولي انه انسان جميل بشخصيته واخلاقه .. هتحب او هتحبي النوع ده ؟؟

اما بقى الشخص ال بيحلم بحد يكون فيه كل المواصفات دي .. ف انا بقوله استحاله هتلاقيه .. لان مفيش حد كامل من مجاميعه كده

وانا بالنسبالي .. انا افضل الانسان الوسط ف كل حاجه .. اقولكم حاجه كمان

(( لما فعلا بتحب بجد .. بتحب حد مجاش ع بالك ولا ف خيالك خالص .. حد عمرك ماشفته ولا تخيلته نهائي

**رأيك فعلا صح جدا رحمه ....
**وطبعا الانسان علشان يتحب لازم يتميز بعده اشياء مختلفه ....
**وطبعا الشكل والاخلاق مهمين ,,لازم تكون اخلاقه عاليه ولازم يكون مقبول....

شكرا رحمه
لكن
عندما يقرر الانسان ان يحب
نعم
عندما يقرر
لابد
ان يكون الحبيب مناسب لكل ما يحلم به
لكل منا احلامه الخاصه وامنياته
شكرا جدا على مجهودك

ميرسى يا رحمه على موضوعك
انا فى رأيى ان الاعجاب ده انجذاب لشئ معين فى الطرف التانى
ممكن الاعجاب بالشكل ككل او ممكن بشئ معين فى الشكل
ممكن بالعين نظرتها بتعبيراتها
ممكن بالأخلاق او بالتدين
ممكن بصفه من الصفات..ممكن بالثقافه
بقوه الشخصيه بالجاذبيه....اوجه كتير للأعجاب
بس اعجاب والاعجاب من نظرى زائل
ممكن مع زوال الشئ او مع الوقت وظهور كل الطباع

لكن الحب احساس تانى
الحب عمره ماكان قرار
احب ده او لأ اختار الأخلاق ولا الشكل ولا المال
الحـــــب احساس تانى شكل تانى
زلزله للكيان كله
هزه قلبيه متعرفيش جت ازاى ولمين وليه
مش تفكير ولااختيار
الحب انى اتشد لحد معرفش اتشديت ليه
لوعرفت سبب واحد يبقى اعجاب وزى ماقلتلك
الاعجاب زائل وبيكون لشئ محدد
لكن الحب مستمر لانه حب روح وكيان مش معروف ليه سبب
ميرسى يا رحمه
موضوعك هاااااايل
ربنا يوفقك يا قمر

طبعا
كل الود والاخترام لاختنا الغاليه نيرفين
وكلنا نسعد بكلماتها وافكارها التى تعطينا المثل والقدرة على فهم الكثير من الامور
شكرا جدا نيرفين
--------------------
ولكن
اسمحى لى بتعقيب بسيط
ويمكن نكون متفقين فى الرؤيه
ومختلفين فى الاسلوب
------------
العقل بفكر ويرى ويختار الحبيب
وبعد ذلك القلب يدق ويعلن لحظه الانصهار
وبصرخ انى احب
اذا لابد من تدخل العقل واعطاء القرار
اذا لابد ان يقرر الانسان
انه سوف يطلق لقلبه العنان لاعتناق الحب
لانه لابد ان يكون الانسان عاقل فى اختياره
هل ممكن ابو حنفى البسيط يفكر يحب بنت حسنى مبارك؟
او ممكن يحلم انه يتجوز مثلا الست روبى اطال الله لنا فى العجله بتاعها
لابد ان يكون التفكير
حتى لايقع ابو حنفى فريسه لجمال لوسى وشرين
ولا يرمى نفسه فى الهلاك بحبه لبنت اللى بارم ديله
لابد ان يعرف الانسان امكنياته الحقيقيه ويؤمن بها حتى يكون واقعيا فى الاختيار
وبعد ذلك يترك لقلبه العنان لاعلان الحب
اعتقد اننا متفقين
ويارب نكون متفقين
وشكر لرحمه التى جمعتنا بموضوعها الجميل وشكر لك اختنا الغاليه نيرفين

تؤتؤتؤتؤ
للأسف مش متفقين ولا يمكن الاتفاق فى هذا الموضوع
طبعا فى الاول بشكرك على كلماتك الجميله
وبشكرك جدا على تعقيبك على كلامى ومناقشتك
وبشكرك على روحك الحلوه فى الحوار
لكن احنا مش متفقين لأن وببساطه انت عقلانى فى تفكيرك عن الحب
او يمكن بتحاول توازن الموضوع بين القلب والعقل
وانا عاطفيه فى تفكيرى وقلبى بيغلب على عقلى
ومش بوزن الامور
يمكن علشان حاولت اعمل توازن بينهم فى افكارى وفشلت كتير لأن عاطفتى بتغلب
ده مش موضوعنا بس بقول كده علشان اعرفك عدم الاتفاق ليه

اخى العزيز انا من رأيى ان اختيار العقل بيبقى لشئ مدروس يعنى اقتناع
مش معقول هقتنع بحد وبعدين اقول لقلبى يالا حب ده
اصرخ واعلن حبك ...هو القلب بيأمر؟؟؟؟
وبرضه مش هفكر فى انسان واقعد بقا اشوف مميزاته وعيوبه
وبعدين اقرر ينفعنى ولا لأ يبقى انا كده بيعجبنى فيه صفات معينه يعنى اعجاب
واحاول بقا اقنع قلبى بيه وانا وهو والزمن والعشره يا احبه يا محبوش
كون بقا انك تعرف حدودك علشان متوجعش قلبك
دى مقدره ..اولا مستحيل تحب بنت حسنى مبارك اطمن الحمدلله مش عنده بنات
لكن تحب روبى ولا اى حد من الفنانات تفتكر ده حب؟؟؟
ما انا برضه وضحت رأيى فى الاول ان فيه اعجاب وبكذا وجه وده زائل
لكن الحب حاجه تانيه لازم فيه معامله ولو بكلمه او نظره او فكر بشوفه وبناقشه
ممكن انسان قليل اجتماعيا يحب واحده اعلى منه او العكس
وحصلت كتير وحصل ارتباط فعلا نماذج الحياه مليانه وسمعنا كتير
وفشل كتير برضه مفيش نصيب واكيد اسباب اخرى...
الحب ميعرفش حدود ولا قيود ولا موانع ولا ظروف
الحب حب
تعال كده نقيسها من نقطه تانيه
ممكن واحده تحب انسان معوق اعاقه تعرقل حركته بس حبته بجد وتمنت الارتباط بيه
وعلشان حبه تستعد ان تتحمل كل شئ من اجله
لوحسبتها زى مابتقول بالعقل هتقول لا الشكل العام والحركه هيبقى الحمل عليا فى كل حاجه
مش هيقدر يخرجنى وهيغير جدا لوكلمت حد ومش بعيد يبقى عنده احساس بالنقص
لأ وانا اعمل فى نفسى كده ليه هو مفيش غيره
ويفضل هو بقا عايش حياته بين رفض وتجريح علشان قدره
لحد مايلاقى واحده اقل منه ترضى بيه
الحب ممكن يخلى واحد يعشق واحده دميمه بمعنى الكلمه بس الحب خلاه يشوفها اجمل النساء
لكن العقل هيرفض ويحسبها من منظور اخر
الحب والعواطف مقرهم القلب
العقل لحسابات اخرى
زى الزواج التقليدى
الزواج بدون حب
ويالا نصيب يا نحب يا منحبش بعد الجواز
معلش طولت فى ردى
لكن ده رأيى وده رأيك
وفى النهايه مقدرش اقول غير
(رأيى غلط محتمل يكون صح ورأيك صح محتمل يكون غلط)
والاختلاف فى الرأى لا يفسد للود قضيه
يارب رأيى زوجتك يكون زيى علشان الصبح الاقيك بتقولى انا موافقك رأيك صح
ههههههههه
شكراااااا نور

» اشهر عشر اسئله عن الحب
» الجزء الاول:في عيد الحب .. اشهر قصص الحب والزواج بين النجوم (2)
» الجزء الثاني :في عيد الحب .. اشهر قصص الحب والزواج بين النجوم (1)
» الجزء الثاني :في عيد الحب .. اشهر قصص الحب والزواج بين النجوم (1)
» ليس من يتكلم عن الحب ... كمن يتألم من الحب.