ازاي الولد يعامل خطيبته..

ازاي الولد يعامل خطيبته.. هنقول لكم إنتم كمان شوية حاجات بسيطة جدّاً تاخدوا بالكم منها وهي:

1 ـ خليك دايماً على اتِّصال بخطيبتك؛ للاطمئان عليها، ومفيش مانع من كلمة حلوة؛ لأن الموضوع ده هيترك أثر جامد في نفسها.

2 ـ حسّسها دايماً إنها أحلى بنت في الوجود، وإن دي فعلا البنت اللي كنت بتتمناها من زمان.

3 ـ انتهز أي فرصة وهات لها هدية حتى لو بسيطة؛ لأن الهدايا بتقرّب المسافات، وبتفرّح أي حد.

4 ـ تجنب أي تصرف يدلّ على العنف والتهور، زي لما تكونوا خارجين وحدّ يبص لها تقوم تضربه أو تتخانق معاه.. يعني من الآخر كده: خليك جنتل مان في كل تصرفاتك.

5 ـ راعي مشاعرها في تصرفاتك، واوعى تبص أو تعاكس أو حتى تمدح في بنت تانية قُدّامها.

6 ـ حسّسها دايماً بإنك قادر على تحمُّل مسئولية الحياة بعد الجواز، وده عن طريق إنك تتكلم معاها في أمور الحياة، وتديها آراء جادة، دون الاعتماد على آراء الآخرين.. يعني مش لما تسألك على حاجة تقول لها: معرفش.. لما أسأل بابا أو أسأل ماما؛ لأن الكلام ده ممكن إنه يضايق أي بنت، ويحسّسها إن خطيبها غير قادر على تحمل المسئولية.

7 ـ اشرح لها إمكانياتك المادية وطموحك اللي ناوي تحققه في ضوء الإمكانيات دي من غير كدب أو تزييف.

وفي النهاية أحب أقول لكل ولد وبنت مخطوبين حاجتين اتنين وبس:

الحاجة الأولى:

وهي إن كل طرف يكون عنده استعداد يتغيّر للحاجة اللي بيحبها الطرف التاني، وحابب إنه يشوفها فيه.. وخاصة إذا كان التغير ده هيكون للأحسن.

الحاجة التانية:

بلاش التسلط ومحاولة فرض الرأي بدون أسباب منطقية.. ومفيش طرف يدي قرارات للطرف التاني على شكل أوامر إذا لم تنفذ فإن العقاب سوف ينزل..

**انا بعترض علي نصايحك ساره,
**لان لو عمل بيها الولد هيكون بيتجمل في فتره الخطوبه وبعد الزواج تكتشف الزوجه انها مع شخص اخر لاتعرفه ......
**المفروض في فتره الخطوبه يتعامل كلا من الطرفين بمنتهي البساطه والتلقائيه علشان يكتشفوا شخصيات بعض كويس ويعرفوا العيوب قبل المميزات وعلي كلا منهما اذا وافق علي الاخر ان يتقبله كما هو.....
**وكمان فتره الخطوبه موجوده علشان كلا من الطرفين يعرف الاخر جيدا ويستطيع التعامل معه بشكل صحيح وليس الهدف منها ان يعيشا في خيال الحب فقط.....

**طبعا فهماكي ساره ,دي صداقه سنين.....
**بس انا حبيت يعرفوا بعض الاول وبعدين ينفذوا النصايح بتاعتك ,يعني لما يتأكدوا ان اختيار كلا منهم صحيح...
**وطبعا انتي صح لان الحياه لازم تكون فيها كلمه حانيه لان ده بيجمل الحياه....
**وشكرا ساره علي نصايحك .........

ميرسى ياساره على التوبيك
وياريت فعلا اى اتنيين فى فتره الخطوبه يخدوا بالهم من تصرفتهم لا نها بتفرق كتير فى الاسلوب والمعامله ويكونوا كما على طبيعتهم وميكنش حد بيتكلف قدام التانى علشان يرضيه بس علشان التفاهم بين اى اتنيين اهم شئ مطلوب