ماتزعلش مني ياحبيبي

ماتزعلش مني ياحبيبي

لما الست تكون عايزا تصالح جوزها شوف هاتقوله ايه


طب ??????(بالله عليك)ماتاخد على خاطرك مني
دانتا نور عينى
خلاص بقى ماتزعلش

*******
تعالى نقعد فى الفراندا.. دا الهوا الليلة يرد الروح ياحبة عيني
ايه يعني لما أفضفض بكلمتين واقفين فى زوري.. مش لازم أقولك اللي مزعلني عشان أصفى
هوّ انا ليا مين غيرك يعني؟
طب دانا عاملالك الرز بلبن اللي بتحبه ...
طب تعدمني لتاكل الطبق ده.. دانا عاملاهولك بايدي.. ياسيدي

*******
دانا كنت عايزاك تاخد بالك بس انى تعبانة من الشغل والعيال.. وشغل البيت.. مانا برضك بحس
كنت عايزاك تعذرني لو ليلة دخلت من برّه ومالقتنيش متوضّبالك زي مابتحب
كنت عايزاك تطبطب عليا لو لقيتني رابطة راسي من الصداع
كل اللي أنا كنت عايزاه شوية حنيّة.. حنية ياراجل من بتوع زمان .. فاكرها ياحبيب قلبي؟

*******
هوّ أنا ليا بركة الا انت؟ هيّ الضحكة بتطلع من قلبي الا معاك؟
طب (بالله عليك) لتضحك بقى.. يووه مستخسرها فيّا؟
أهو بتضحك.. و ربنا بتضحك.. ماتكتمهاش .. افرجها بقى عشان ربنا يفرجها
طب قوم البس جلابيتك.. دانا غاسلاهالك وكاوياها بنفسي و معطراهالك
قوم ياخويا.. يابويا.. ياسندي.. ياحبة قلبي من جوة
يالاّ كل الرز بلبن بقى عشان أجيبلك الشاى أبو نعناع المعتبر

*******
على فكرة انا دمي خفيف (والله)؟؟؟؟؟.. أخف من دم صحابك بتوع القهوة.. انكشني بس واتفرج
ادّيني انت الأمان كده وأنا أعيّشك في جنة.. وأخليلك بيتك ده بيرقص من الفرحة
لأ مش بيتك.. أخليلك دنيتك كلها ترقص
يالاّ تعالى.. ورحرح.. مش بقولك الهوا يرد الروح

*******
دانا مش عايزة غير ريق حلو.. كلمة حنيّنة
ايدك على كتفي كفاية عليا
قوللي سلامتِك.. تسلم ايدِك.. متحرمش منِّك.. بس قولها من قلبك
.. ياحبيبي

*******

ممكن دا يحصل
ولا هما فالحين في الخناق وبس

ياريت تجاوبو وتقولو رايكو

دانا مش عايزة غير ريق حلو.. كلمة حنيّنة
ايدك على كتفي كفاية عليا
قوللي سلامتِك.. تسلم ايدِك.. متحرمش منِّك.. بس قولها من قلبك
.. ياحبيبي

**الله ياجنه,, كلمات واقعيه جداااا وتكررها معظم الزوجات ...
**وفعلا لو يدرك الزوج اهميه الكلمه الرقيقه او اللمسه الدافئه لزوجته ,, لكانت الكثير من المشاكل انتهت ...
**موضوعك رائع جنه واجمل جمل رائعه وليها هدف جميل...