كيف تعرب عباره رجل وامراه

مساء الخير على جميع اعضاء المنتدى الي المشغولين وباين ان الامتحانات واخده كل وقتهم بس يا رب يوفقكم جميعا وينجحكم
قرأت قصة اعجبتني بمضومنها وحبيت اشرككم فيها واعرف رايكم فيها وانشاء الله تعجبكم القصة لكاتبه سورية اسمها شذى برغوث
اما مضمون القصة فهو كالآتي

" كي تبنى علاقتهما على نور قال لها: يجب أن تتعلمي وضع النقاط على الحروف، وتتعلمي أصول الاعراب.
كانت متفهمة تماما، فرحبت بالفكرة وأبدت استعدادا للتعلم بأسرع وقت ممكن كي تسير حياتهما بسلام.
جلس يلقنها الدرس الاول.
قال لها: اسألي وأنا أجيبك.
قالت له: كيف تعرب عبارة ( رجل وامرأة ).
قال لها: الرجل مخلوق.. والمرأة مخلوق لأجله..
قالت له: وإذا تغير موقعهما في الجملة ؟
قال لها: تعرب بعدة أشكال. فمثلاً الرجل متصرف، والمرأة: ممنوع من التصرف الا باذنه..
وقد يعرب الرجل فعلاً وفاعلاً، والمرأة مشبهاً بالفعل أو حاجبا للفاعل.
وقد يكون الرجل جاراً والمرأة مجروراً.
أما إذا جاء الرجل حرفاً، فيكون إما حرف جزم أو نصب.
أما المرأة فهي حرف علة.
أما بالنسبة للحركات الاعرابية:
فالرجل دائما مرفوع أو منصوب، والمرأة إما ساكن أو مكسور.
عندما رآها ساهمة، ولم تعقب بكلمة، قال لها: هل استوعبت الدرس جيداً ؟
قالت له: للأسف يجب أن أعترف لك بأني غبية، ومنذ الصغر وأنا أغير أماكن الحركات، فأعرب الكلمات بعكس إعرابها. فإذا لاحظت مني ذلك فأرجوك لا تزعل، واستسلم لغبائي فلا يد لي فيه.

هي دي المراه

يا رب تعجبكم ونشوف تعليقكم

بصراحـــــــــــــــــــه يا مندى انا مش هاكتب رأيى فى موضوعك
حتى لا أكون متجاوزه لحدود الزوق
انا بس عايزه اعرف
ليه اخترت موضوع زى ده ونزلته فى المنتدى؟
ويا ترى متوقع يكون ردنا عليه ايه؟
انا بدأت اصدق انك فعلا عدو المرأه
وزياده على الصفه دى حاجه كمان
بس مش هاقدر اقولها !!!
شكـــــــــــــرا

بصراحه يا مندي انت ايه حكايتك مع المراه بالظبط وايه العداوه دي كلها
وبصراحه ان مش مصدقه اني العبارات ديه تكون خارجه من مؤلفه
ان تقوم بوصف نفسها في قصتها بهذا الوصف

في البدايه احب اوضح للاخوات العضوات المبجلات
اني مضمون القصه اللي انا نقلتهلكم مش من تاليفي ولا تاليف راجل
دي قصه لكاتبه سورية اسمها شذى برغوث
واعتقد اني واضح من اسمها انها امراءه
انا كل الموضوع اني نقلت وجهه نظرها ليس الا
وانا مش مسئول عن الفهم الخاطيء لمضمون القصه
ومش لاقي مبرر لغضبكم مني
وعلي كل حال الخلاف في وجهات النظر لا تفسد للود قضيه
عسي ان تتقبولو كلامي وان صح

حقيقي مش عارفه ارد اقول ايه وانا مش مصدقه اني ممكن تكون في كاتبه تكتب هذه القصه
التي تعتبر ان المراه ما هي الا تابع

حقيقي انا مش عارفه اتمالك اعصابي من اول ما قريت الموضوع ده
وفعلا مش لاقيه رد غير اني المراه والرجل كيان واحد وعمرها ما بتكون تابع

بصراحه يا جماعه انا مش لاقي مبرر واحد للحمله الشرسه علي الموضوع
اعتقد اني مندي كاتب موضوع علي لسان كاتبه وهو وضح الكلام ده
هو كل اللي عمله نقل وجهه نظرها ليكم
يا ريت تبصو علي الموضوع من منظور اخر اكيد هايختلف بالنسبالكم

انا معاك طبعا يا شريف ان الموضوع على لسان كاتبه سوريه
بس اكيد اى موضوع بيتم وضعه فى المنتدى بيعبر بشكل او باخر عن وجهة نظر ناقله
واكيد مفيش اى حد بيضع موضوع ولو كان على لسان قائله الا اذا كان مقتنع بما فيه وبوجهة نظر كاتبه
ومتفق معه عليها
ومن هنا جاء الاختلاف مع مندى
يعنى ممكن يكون مش هو اللى كاتب الموضوع
بس اكيد مقتنع وموافق على مضمونه
-انا بس حبيت اوضحلك شريف ان غضبنا له مبرر مش زعل وخلاص

انا مع ايناس فى رايها
وعلى العموم يامندى انا مش متفقه مع الكاتبه دى
وكل واحد فينا بيعبر عن رايه
والمراه ليها قيمتها الكريمه التى خصها بها الاسلام
وكفى

بصراحه يا جماعه انا مش عارف ليه الحمله الشرسه علي الموضوع
مندي عرض وجهه نظر كاتبه في موضوع معين وانا معاكم انه لما ينقل وجهه نظر بيكون مقتنع بيها وساء كان هذا او ذاك فهذا لا يستدعي كل هذا الهجوم العنيف ولتكن هذه هي وجهه نظره
والقول الشائع بين اصحاب الفكر الخلاف في الفكر لا يفسد للود قضيه
ولكني اري من ردود جميع البنات ان ما قام به الاخ مندي هو جرم يستحق عليه العقاب فكيف يجرؤ علي سرد موضوع كهذا في منتدي الغالبيه العظمي من اعضاءه بنات 0
ولقد بحثت عن هذا الموضوع للكاتبه المذكوره ووجدته في منتديات كثيره والاغرب من ذلك ان كل من قام بنقل هذا الموضوع بنات ولكم ان تبحثو وتتاكدو ولكم ايضا ان تنقلو اليها وجهه نظركم

بالعكس يا شريف مافيش اى حملة ضد مندى من اى نوع بالعكس هو عرض موضوع مهم جدا ان راى بعض الرجال تجاه المراة والتحامل عليها موقف ثابت عندهم لا يختلف مهما اختلفت المواقف حتى لو كان الموضوع بسيط زى الاعراب وغير كل كدة وكدة احنا مبسوطين من مندى لانه قدم للمراءة خدمة كبيرة بعرضه للموضوع اللى بيثبت التحامل ضد المراة والتمييز ضدها والمفروض ان الرجالة هما اللى يزعلو منه مش البنات

شكر يا مندى على خدمتك الكبيرة

حقيقى نحن نعجزعن الشكر ليك

طبعا في البدايه احب اوضح ان كل عضو ليه الحريه الكامله في اختيار المواضيع التي يقوم بطرحها ما دامت لم تتعلق بالتجريح او الاهانه او اي مخالفه لشروط المنتدي
وانا شايف اني مندي كونه انه ينزل موضوع زي ده طبعا لازم يوكون مقتنع بوجهه النظر ديه وطبعا كلامه معجبش بنات كتير وكل واحده ليها الحق في التعبير عن رايها دون التجريح
وانا شايف انكم اديتو الموضوع اكبر من حجمه لانه في النهايه دي وجهه نظر واحد من ضمن 70 مليون ولا احنا وصلنا لكام دلوقتي
واكيد في كتير بيتفقو معاه وكمان في اكتر علي النقيض
اكتب كما شئت وعلق كما شئت ولكن مع احترام حريه الاخرين