بدلة ظابط

دو دو دو سي لا سي لا صول
صول لا صول فا مي فا صول
لالالا سي لا دو سي لا صول
فا صول فا مي ري دو دو

يلا مرة كمان بس نغني كلنا واحمد يعزف على الاكسلفون، واماني على البيانو، وطارق اكورديون، ومنال، مثلثات

والله زمان يا سلاحي
اشتقت لك في كفاحي
انطق وقول أنا صاحي
يا حرب والله زمان

برافو عليكم انتم الاربعة هايلين، هأقولكم بقى فزورة في اغنية
انا بموت في الفوازير، وعارف الفوازير بتاعت سمير وجورج في رمضان
فو فو فو فو
فوازير رمضان ايوحة
فوازير رمضان اياحة

انا بقى هأشوف فزورة أبلة وأحلها قبل العيال كلها، أبلة صوتها حلو أوي وهي بتغني
قولي يا أبلة

جدي نشاها
بايده بناها
لكن راح في ترابها مجاش
سابها بحالها
ومالها لأبويا
لكن أبويا ما ورثهاش
يسكت ابويا هيعمل ايه؟
والسجان بالنار حواليه
وأنا؟
أنا جه دوري مع الحرية
دم الثورة جري ف ايديا
خدتها منه غصب عنه
وتعب جدي ما رحش بلاش
انتهى عهد الضلال
عاد لنا المال الحلال
يوم ما أممنا .....

ها؟
خلاص .. انتم بقى بكرة كملوا الفزورة، ايه ده؟ هي خلصت؟ .. لمينا الكراريس بتاعتنا وروحنا بدري،
خرجت من شارع الأزهر ومروح، أروح فين أروح فين؟ أروح عند عمي، العب مع طارق، عديت على الموسكي وخرجت منه على شارع الجيش ومشيت ع الصف التاني عند تسيباس، بعد تسيباس الحارة اللي فيها محكمة درب الجنينة، وبعدين الحارة اللي على بابها البنزينة، بتاعة غيط النوبي، طيب الفزورة بقى
جدي نشاها بايده بناها .. نشاها يعني هو اللي عملها من الأول، تبقى ايه تبقى إيه؟ آه القهوة بتاعت أبويا، ما هو كان عنده قهوة هو وعمي وبعدين باعوها، وبعدين راح اشتغل قهوجي، تبقى القهوة، لما أروح البيت اسأل عمي حبيبي، بعد غيط النوبي فيه درب المصطفى، اللي أدامه الناحية التانية جامع الرملي، ايوة بير حمص اهي، دخلت على بيت عمي، وكانوا لسة بيحطوا الغدا


انا بقيت بأقعد عند عمي كتير أوي، لألأ مش كتير أوي، انا قاعد هناك على طول وأطيب واحدة في الدنيا ماما بطة مرات عمي، كل ما تشوفني تقولي اقعد عشان تاكل ، يا بني أنت جلد على عظم يرضي ربنا ده، وكمان أبلة بنت عمي .. هي بتحفظني جدول الضرب، ولو ما حفظتش بتبصلي بصة تخليني أحفظ عى طول، وتمللي اتلخبط في سبعة في تسعة بكم .. بس بقيت حافظها تلاتة وستين
وكمان هي بتفحسني معاها في كل حتة، وباروح معاها عند صحباتها، وساعات واحنا في الشارع اقف عند عربية الكشري .. وهي تشدني، وتقولي بلاش قلة أدب الأكل في البيت مش من الشارع، ولما تكون ماشي مع واحدة، اوعى حسك عينك تخليها تعدي من ادام القهوة اللي قاعد عليها الرجالة عشان عيب، وكمان لما تيجي تعدي مع واحدة، انت الراجل يبقى ناحية العربيات، وكمان قبل الأكل تغسل ايديك وبعد الأكل كمان، ولما حد يديك حاجة تقول مرسيه، وانا بقى هأتعلم كلمة مرسيه دي، وكل ما حد يقوللي حاجة أقوله مرسيه، وانا أول مرة قلت مرسيه لحد، كانت أبلة خدتني معاها عند صاحبتها وجابتلي لمون، وانا شربته على بوق واحد، بس أبلة بصتلي
وانا فهمت بقى .. وبصيت لصاحبة أبلة وقعدت افتكر الكلمة، اللي زي شكرا وفي الاخر قلتلها
برسيم
برسيم يا جحش؟
اسمها ايه يا ولد؟
وصاحبة أبله قالتلها هو غريب .. قول شكرا يا حبيبي تلاقيه نسي
لما باروح عند عمي كل حاجة بتبقى حلوة اوي، بناكل ع السفرة، أصلي مع سمير ابن عمي في الجامع، وكمان بياخدني معاه الكبريتاج بتاع حلوان، واغرق منه وأموت بقى لألأ .. الكدب حرام، المرة اللي فاتت ما متش ولا حاجة، بس قعدوا يطلعوا مية من بطني، ومن مناخيري، وانا دايخ بقى
وكمان بأروح معاه نادي مختار حسين بتاع الحديد اللي في شارع عماد الدين، ويجيبلي سفنج عشان أعمل كورة شراب، وماما بطة تديني الشرابات القديمة اعمل بيها الكورة.. وكمان في بيت عمي ساكن عمي ..آه صحيح ما هو بيته
فاضل مين .. أيوة أبيه يسري البطل .. أبيه يسري البطل .. ده عبر القنال بقى، وحطم خط بارليف، ورفع العلم.. وحارب الإسرائيلين، وخد نيشان وميداليه من الجيش وكمان ادوله مصحف وشهادة من الجيش انه بطل .. وكل الناس في القهوة اللي عند عمي لما يشوفوه جاي يقوموا يوقفوا .. ومفيش أي حد في الحارة عند عمي ممكن يكلمني، أي حد يكلمني ، أقولهم على طول .. انا اخو أبيه يسري البطل، وأبيه سمير اللي بيلعب حديد.. وكلهم بيحبوهم، حتى سيد جلال بتاع المستشفي اللي في باب الشعرية يعرفهم، وهما كمان بيحبوا سيد جلال، عشان هو بيحب الفقرا، ومعلقين صوره في كل مكان في الحارة، وانا بحب سيد جلال، ولما ييجي عندنا اروح أبص على رجليه، أصل بيقولو رجليه كبيرة أوي، عشان طول عمره، كان بيشتغل، وبعدين بقى غني اوي، بس مش بيحوش فلوس، هو لما بقى غني، عمل مستشفى كبيرة أوي في باب الشعرية اسمها مستشفى سيد جلال، الحكومة بتسميها مستشفى باب الشعرية، بس الناس مش بتقول كده بتقول مستشفى سيد جلال.
سلمت على أبيه يسري البطل .. وقعدت اسمعله وهو بيحكي على الحرب، وافتكرت الفيلم بتاع اول امبارح بتاع العصفور، اللي محمود المليجي حاطه في القفص والناس بتغني وتقول

رايحين رايحين
رايحين في ايدينا سلاح
راجعين راجعين
رافعين رايات النصر
باسمك يا بلدى جيشك و شعبك يردوا التحدى

وانا أقعد اطبق ايدي بقى وانا باسمع، وأبقى عاوز ألبس بدلة الجيش، وأعمل زي ابيه يسري، يارب يخليك يا ابيه يا بطل

انا بقى عاوز اسأل عمي على الفزورة اللي أبلة ادتهالنا قبل الإجازة بتاعت جدي نشاها
عمي
هو انتم لما عملتوا القهوة انت وبابا كان جدو اللي عاملها
لأ لما جينا من بلدنا انا وابوك يعني من الواحات الداخلة، اشتغلنا قهوجية، وبعدين فتحنا قهوة صغيرة، وجدك الله يرحمه، أسس حتة ارض هناك
عمي هي الواحات بعيدة
يومين بالقطر والأوتوبيس لغاية ما توصل، إحنا آخر حتة في مصر في قلب الصحراء، ما حدش يعرف عننا حاجة، بس مصريين زي كل المصريين، آخر مكان في مصر الناس دايماً تقول أسوان، وماحدش ليه بيقول الواحات الداخلة مش عارف
عمي هي الواحات حلوة؟
حلوة؟
دي جنة ربنا في الأرض، احنا بنقوم الصبح قبل ما الفجر ما يأدن، نخرج على عيون المية، عندنا اربع ابيار وعيون مية، واحدة سخنة أوي، وواحدة نص نص، وواحدة ساقعة، نستحمي في عيون المية، ونتوضى كلنا وكل الرجالة تروح ع الجامع، وعلى ما نرجع تكون الستات عملوا الفطار، لبن، ونسقي فيه عيش شمسي، أو نحط ع اللبن شعرية بتاعت الشعير، وناكل التمر، لما يكون ناشف يبقى اسمه بلح، وبعدين نركب الحمير وناخد السعي
يعني ايه سعي ؟
يعني المعيز والجديان والجمال، ونطلع بيهم على الأرض اللي فيها النخل، ونطلع النخل نجيب التمر، وماحدش بيتعامل بفلوس هناك، احنا ندي التمر للتاجر بتاع التمر، وهو يدينا بيه بضاعة، ساعات قماش وساعات حلل، ونرجع نتغدى ونصلي الضهر وننام، وبعدين نقوم قبل العصر نصلي، ونروح نشوف السعي تاني، ونيجي المغرب خلاص بقى، نبقى عاوزين ننام بس نصلي تاني العشا، وننام، ولما يكون ليلة اربعتاشر في شهور ربنا، نلم بعضنا كلنا الحريم والرجالة والعيال ونعمل دايرة كبيرة ونقعد نغني، ولا فيش يوم يتغير عن يوم كل الأيام كده .. بس انا وأبوك بقى، وعمك حسين صاحب القهوة اللي كان فيها أبوك، قلنا نيجي مصر بقى نشتغل
عمي طب ايه .. اللي جدي نشاها بايده بناها لكن راح في ترابها ماجاش
اسأل أبيه يسري
أبيه يسري إيه اللي جدي نشاها بإيده بناها لكن راح في ترابها ماجاش
مين اللي قالك الأغنية دي؟
أبلة في المدرسة
أبيه يسري رسم مربع على ورقة، وقاللي بص دي مصر هي المربع ده، وبعدين عمل عليه خط من اليمين اللي فوق للشمال اللي تحت
قاللي بص قبل آخر الخط اليمين اللي فوق ده، اللي جدك نشاها بايدة بناها، والواحات اللي اتولد فيها جدك وأبويا وأبوك قبل آخر الخط الشمال اللي تحت، يعني جدك من أول مصر لآخرها نشاها
مش فاهم حاجة
أهو أهو جه في التلفزيون
التلفزيون كان جايب السادات راكب مركبة في التلفزيون ولابس بدلة بيضا، ومراكب كتير في البحر معاه، وكلهم بيغنوا ويرقصوا، والمذيع عمال يقول، افتتاح قناة السويس، ويقول احنا اللي حفرناها، واحنا اللي أممناها ..أممناها؟ الكلمة دي انا عارفها .. ايوة ايوة ...ايه ده استنى استنى
انتهى عهد الضلال
عاد لنا المال الحلال
يوم ما أممنا....
أيوة أيوة القنال القنال القنال
يعني جدي راح في القنال دي، يعني دي بتاعتي، يبقى جدي هو اللي عاملها، مش مهم هو من الواحات، بس برضه القنال دي بتاعته، وبقت بتاعت أبويا، وبتاعتي انا كمان، يبقى جدي عنده القهوة، والمعيز، والنخلة، والبير والقنال
السادات كان جنبه ولد صغير، لابس برضه بدلة ظابط، اسمه جمال،
ابيه قاللي مش عاوز تبقى زي ابن السادات
قلتله: انا بحب إسمي