لو ربنا فك عقدتك واتخطبتى

آنستي العزيزة.. لو ربنا فك عقدتك.. واتخطبتي.. فإليكِ نصائحي

حتى تأخذي بخطيبك من مركب الخطوبة إلِّي محدش عارف هاترسى على إيه.. إلى

مثوااااه الأخير في قفص النسانيس قصدي قفص الزوجية السعيد ..

أجمل ما في الخطوبة العزومات الرومانسية.. على أحلى محلات

أكل في البلد.. واللي عمرك مانتي شايفاها بعد الجواز.. المهم

نصائحي لك عند أي عزومة مع خطيبك..

1 - الأول لازم تعرفي إن الشوكة والسكينة بيتمسكوا من إيديهم من

الطرف يعني مش من الوسط ولا من البوز زي الخنجر ولا من فوق طبعًااا

2 - العيش أوعي تفضحينا وتقطعيه بسنانك.. ولا الرغيف نصين بإيدك

وكل نص لقمة وتحشري.. أوعي.. العيش بيتقطع بالسكينة في

الطبق.. وبعدين تاخدي لقمة.. لقمة .. بالعافية.. قال يعني نفسك

مسدودة.. اضغطي على أعصابك جدااا وبعدين لما تروَّحي.. إبقي

اطفحي زي ماانتِ عايزة

3 - الشوووربة.. أبوس اييييدك.. بند الشوربة ده مهم جدًاااا

الشوربة تتشِرب من غير صوت خالص.. ومن غير ماتقعدي تنفخي

فيها.. زي القهوجي اللي بينفخ في الحجر للزبون.. وطبعًاااااا عايزِك

تنسي تمامًا.. الطاسةاللي بتحطيها في بقك في البيت

بالمعلقة وبدون صوت.. سخنة, ولعة , برضه بدون صوت

وتسيبي تلت الطبق ع الأقل.. مش تميليه.. عشان تلهفيها لآخر نقطة

4 - الرز طبعاً .. بيتّاكل بالشوكة.. أوعي إيدك تتمد على المعلقة

وتغرفي من طبق الرز وتعبّي.. إوعي.. الرز بالشوكة.. وكإنك

بتبوسيه مش بتاكليه

5 - المكرونة.. الاسباجتي.. برضه بالشوكة.. تتلف على طرف

الشوكة.. لحد ما تخلص وبعدين تحطيها ف بؤك من سكات.. مش

تشفطي المكرونة عود عود

6 - السمك.. مشكلة.. شوفي.. بتفصلي اللحم عن الشوك

إزاي..؟؟ تقطعي اللحم من النص.. بالطول وبعدين تفردي اللحم على

الجانبين ولما تخلصي ناحية.. متقلبيش السمكة.. بلاش فضااايح

شيلي السلسلة بالشوكة والسكينة وحطيها في جنب الطبق

وكملي أكل النص التاني.. وبدل الفيلم الهندي ده.. نصيحة

ماتكليش السمك خالص.. قولي مابحبش السمك وخلصي نفسك

7 - الجمبري.. -إذا كنتي عارفاه-.. أول ماطبق الجمبري ينزل.. بصي للجمبري

بطريقة قال يعني زهقانة من كتر أكل الجمبري واتنهّدي جامد وقولي.. برضه..؟؟؟

وتروحي قاطعة راس الجمبريّاية.. بالشوكة.. أنا ف عرضك إنسي المصمصة دلوقتي

8 - البطاطس سواء مسلوقة أو محمرة.. أوعي تهرسيها وتدبيها على

الرز وتدّي ...لا..لآ...لآ...بالشوكة حتة حتة وإنت زي ما تكوني

هاتعيطي من كتر ما البطاطس صعبانة عليكي

9 - الفاكهة.. لو الفاكهة فيها بذر.. طلعيه من بؤك بالراحة وحطيه في

إيدك وهي مقفولة.. وبعدين في طفاية السجاير اللي ع الترابيزة

أوعي ياحبيبتي من نظام التفتفة للبذر.. إنسي

10 - ولما تخلّصي أكل تحطي إيدك على بطنك.. -اللي عصافيرها

بتصوصو من العينات اللي كلتيها-.. وتقولي له مش ممكن.. أنا

عمري ما اتفجعت كدة.. أنا قدامي أسبوع.. هابطّل أكل فيه

وبعدين تمسكي الفوطة اللي دايمًا موجودة على التربيزة من غير

لزمة.. وتبوسيها.. آل يعني بتمسحي بؤّك

وبعدين تستأذني منه لإصلاح ماكياجك.. تدخلي التواليت

وتطلعي من شنطة إيديك.. لفة الفول والطعمية اللي جايباها

معاكي.. وبالهنا والشفاااا
منقول

لا حرام عليك يا ابوحنفى انت كده
بتتضحك على البنات وبتخدعهم
وتخليهم يصدقوك ويستنوا العزومات
وشوربه وجمبرى وفاكهه ايه الكلام الكبير
ده يابنات عريسان اليومين دول اللى طول منهم
سندوتش فول وطعميه تبقى اتفتحت لها طاقه القدر
والست الوالده داعى لها
وبعدين لو البنات عملت بنصحيتك
تبقى بتخدع خطيبها وهايتفاجأ بعد الجواز
انها بتاكل بأيدها الاتنين
لا البنت لازم تتصرف على طبييعتها
خصوصا مع خطيبها ولو عاجبوا يكمل مش عاجبوا
................؟؟ ولا على ايه بلاش
شكرا يا ابو حنفى
بتعلمنا ازاى نضحك عليكوا

يا سلام علي موضوعك يا ابو حنفي موضوع شهي زي الاكلات اللي بتعلمه للعانسه اقصدي الانسه قبل الجواز وبعد الخطوبه 0
تفتكر اني في واحده هاتقدر تستحمل الطريق ديه ده كان زمان يا راجل وعايز تعرف السبب امشي في الشوارع
وانت تلاقي ما شاء الله افيالا تمشي علي الارض تحس بزلازل وبراكين ويا سلام لو ركبو مكروباص لاني سواق التاكسي بيهرب منهم 0
كل ده وتقولي شوكه وسكينه دول يا راجل ياكله الشوكه والسكينه والمفرش ولو انت جمبها ممكن تاكل دراعك وقال ايه مش واخده بالها 0يا راجل خلي كلامك في سرك مضحكش علينا الاجانب 0
خليها كده في بيتها تشرب الشوربه وتنفخ وتبرقع زي ما هي عايزه وكمان علشان الغلبان اللي مش عارف مصيره يبقي عنده صوره حيه من طريقه اكلها علشان يعمل حسابه ويخبي العيال وينسي طبعا حكايه انه يعزم مديره او رئيسه في العمل 0
في حاجه البنات مش واخدين بالهم منها الشباب بيتجوزوهم علشان يدخلو الجنه اصلي صعب تبقي نار في الدنيا ونار في الاخره 0
وتقولك فول وطعميه هو بعد ما يخطب هايكون في جيبه مليم احمر والمشكله اني الشباب تعمل فيهم خير وهما نكارين للجميل وبيتبترو علي النعمه اللي في ايديهم يعني رضينا بالهم والهم مش راضي بينا ويا اسفاااااااه

ميرسى يا ابوحنفى على موضوعك
بس للأسف انت مش واخد بالك
ان الأتيكيت امرأه
الأفعال دى اللى الرجاله بيكسفونا بيها ادام الناس
وبعدين استنا اى شاب دلوقتى
يقدر يعمل دعوة زى دى
بلا خيبه مش لما يشتغلوا الاول
ولما يشتغلوا هيحوشوا مرتب شهرين علشان يضيعوه فى عزومه
اطمن محدش هيكسف التانى
اصل اللى بتقوله ده بقى فى الاحلاااااام
ربنا يعين الشباب ويصبر البنات
على الغلب
شكرااااااا ابوحنفى
مش عارفه ليه حاسه ان انت اللى بتشرب الشوربه بصوت
يادى الكسوووووووف
هههههههههه
ميرسى لموضوعك

فى البدايه
اشكر كل من رد على الموضوع او من سوف يقوم لاحقا بالرد
---------------------------
وهنا العتاب
نبرفبن
يصح السر اللى انتى عرفاه تفضحينى كده وتقولى لكل الاعضاء عليه؟
مش شارب شربه تانى فى وجودك
وهااقول كمان لواليد
مش يعزمنى تانى
ناقص كمان تقولى بسمح بقى بكمى
لا والنبى افضحينى وقولى
انا زعلان منك جدا جدا جدا
شكرا

معلش يا ابوحنفى مش تزعل بقا
انا قلت مش عارفه ليه حاسه ان انت بتشرب الشوربه بصوت
لكن مش قلت انك بتشرب بصوت
انت اللى قلت على نفسك
انا صونت السر انت اللى قووولت
وبعدين شرد روحك
وقلت انك بتمسح فى كمك
انا مرضتش اقول وانت قووولت
والدليل على انى مش بفتن
مقولتش انك بتوقع الاكل على هدومك
ولا هقول لحد ده سر
اطمن

على فكرة انتو عمركو ما بتعترفو انكم بتعملو حاجه ابدا يا رجاله
على فكرة بقى يا اخ ابو حنفى المفروض تقول الكلام ده للرجاله لان ابنات عموما بيخدو باهم من الحاجات دى ديما اما الرجاله بقى ما بيهموهمش ا منظر ولا شكل ولا اى حاجه من دى
هههههههههه
عموما ميرسى على النصايح الغاليه دى

هو ايه ان شاء الله العريس منين
وبعدين شوكه ايه وبطاطس ايه
العلم تطور يا نور انت قديم قووووى
خلاص ملوش لازمه التمثيل انت
من اول يوم حتى لو البنت بنت نااااس جداااا
بتسدو نفسها على الدنيا
ومابتفكرش خير فى المصيبه اللى جتلها
شكراااا بس وفر النصيحه لنفسكم افضل

على فكرة يا ابو حنفى انا لما اتخطبت للاسف ماخرجتش انا وخطيبى لاى مطعم خالص
مش لسبب بس جات بظروفها
وبعد الجواز خرجنا كتير لمطاعم
وكنت حريصه جدا على طريقة اكلى
يعنى دى نصايح من زمااااااااااااااااان اوى
دلوقتى كل البنات بتاخد بالها من اصول الاتيكيت بقدر الامكان
اه نسيت اقولك انى لما كنت باعمل كده كان زوجى بيقولى كلى براحتك وزى ماتحبى
مش زى واحد بيقولك افيال ماشين فى الشوارع
ويعنى الرجاله هما اللى غزلان ولا ايه؟؟
شكرا ابو حنفى

هو انتى عاوزة تلاقى زى ابو سلمى
يايناس
لو لفتى الدنيا مش هتلاقى
اما اخواتنا
اللى لسه
ميعرفوش سر شويبس
مش هااقولهم عليه؟

مااتحرمش منك يا ابو حنفى
انا عارفه طبعا مين اللى لسه مايعرفوش سر شويبس
وباين عليهم بالطريقه دى مش هايعرفوه خاااااااااااااالص
سلامى لمهاب ومامته

شكرا ايناس على زوقك
وتحياتى الى سلمى وابوسلمى
والى كل الاحبه

» يا شيخة خافى ربنا
» استروني ربنا يستركو
» ربنا يشفيك يا حسام
» ربنا يعين السياره 2/11/2008
» واحد صعيدي قعد يدعي ربنا 15 سنه