ملك حيران

انا حابه اكتب عن قصتى وعايزه اعرف رأيكم ايه فى الموضوع ده
انا فتاه فى العشرينات انا الحمد لله ملتزمه الى حد ما على اد ما اقدركنت بحاول احافظ على نفسى من اى فتنه وابعد عنها لحد ما خلصت الجامعه وبدأت المعاناه ,حسيت بالملل والفراغ حاولت اشغل وقتى بأى نشاط بس برضه رجعت وحسيت بالملل وكنت فى يوم كان نفسى اعمل اى حاجه مختلفه او اكلم اى حد افضفض معاه فقررت ادخل عالم النت واجرب الشات ومن هنا بدأت المشكله اتعرفت على شاب وكان انسان كويس جدا ومحترم وحسيت انه فهمنى بسرعه وفهم شخصيتى انا كنت بتكلم معاه كصديق بس بدأت مره فى مره احس منه بأهتمام زايد واتحولت العلاقه لحب بس من ناحيتى انا مكنتش بحس انى بحبه كنت حاسه انه تغيير فى حياتى مش اكتر وفى نفس الوقت كنت خايفه من الموضوع ده خايفه انى اتعلق بالشخص ده حاولت ابعد بس لا مفر وفعلا بعد مرور الوقت حسيت انى بدأت اتعلق بيه بس فى نفس الوقت كنت خايفه منه .
المهم هو اتعلق بيا وصارحنى بده وقالي كلام حب كتير بس المشكله اني مكنتش عارفه اصدقه مش عارفه اثق فيه حاسه انه صادق وفعلا بيحبنى بس انا مش عارفه اصدق الكلام ده , انا مش بعرف اقتنع بالكلام ده لانى بحس انه مجرد كلام وخلاص دايما بسأل نفسى اللى بيحب حد فين دليل حبه ده ايه الدليل على صدق كلامه , مش كفايه انه يقول بحبك لان الكلام سهل المهم الفعل اللى يثبت ده دا اللى انا اقتنع بيه.
المهم انه قالى انه عايز يرتبط بيا حقيقى بس فى نفس الوقت مش هايقدر وانه عارف ان مفيش نصيب .
انا مش عارفه اعمل ايه ؟
مش عارفه انهى العلاقه دى ازاي لانى مش بحب اجرح حد؟ مش عارفه هو اللى ظلمنى ولا انا اللى هاظلمه؟
وفى نفس الوقت محتاره ازاي حد بيحب حد اوى ومايحاولش انه يحافظ عليه ويتمسك بيه ويستسلم للظروف ؟
مش عارفه اذا كان ده حب ولا ايه ؟
فى النهايه انا مش عارفه المشكله فيا ولا فيه ,انا مش عارفه اصدق الكلام ده عموما خالص انا مش عارفه اقتنع بوجود الحب , حاسه ان الحب ده شئ خيالى بنحلم بيه بس صعب ان الواحد يمارسه صح فى الحقيقه.
ياترى انا صح ولا غلط؟؟؟؟؟؟؟

مفيش حياه من غير حب ,الحب زي الماء والهواء هو طبعا موجود بس ما ينفعش نلمسه ,نحسه بس .
المشكله اولا فيكي لانك متردده الا حد ما ,انتي مش عارفه تحددي هدفك ومش عارفه تثقي في حد .
وثانيا الشخص ده من الافضل انك تبعدي عنه طالما انه متردد وواضح من كلامك انه اناني شويه .
وربنا يوفقك..

انا راي اني مفيش حب ممكن يتولد علي صفحات النت
ومعظم الحب اللي موجود بيكون اجوف
مفيش مشاعر مفيش احاسيس

شكرا يا رنا على ردك وانا متفقه معاكى
وده اللى مخلينى مصدقش اى حاجه عن طريق النت
وده سبب المشكله

عزيزتى ملك لوعايزة تحلى المشكلة دى يبقى فورا وبدون اى مقدمات امتنعى عن الشات مع هذا الشاب لفترة من الوقت قد تكون شهر مثلا وفى نفس الوقت حاولى تشغلى نفسك بحاجة تانية تكون مفيدة وكلمى اصدقائك بصفة دايمة واطلبى منهم ان يكونوا جنبك فى هذا الوقت بالتحديد وانتظرى بعد انتهاء الوقت واسالى نفسك هل مازلتى كما انتى؟وهل هو مازال موجود وعلى عهدة القديم بأنة يحبك؟ وان كانت الاجابة لا فقد مضت المشكلة والموضوع كان لوجود وقت فراغ عندك،وان كانت بنعم فيجب علكى الوقوف والتفكير بنظرة اخرى للموضوع .
ايناس

انا مع ايناس فى رايها ملك خدى وقتك وفكرى بنظره اشمل للموضوع وفكرى فيه من كل الجوانب بس على اعتقادى ان اللى يحب حد ميقفش عقبه فى طريقه خصوصا لو مفيش فى ايده حاجه يعملها ليه ....
وان شاء الله ربنا يوفقك

اولا احب اشكركmohaa علي رايك ولكن انا بختلف معاك في نقطه
انا اعتقد اننا ما نقدرش نقول كل الشباب كداب وووووووووووووووووووو,لان مش كل الناس زي بعضها
وزي ما انا بكون صادقه علي النت فاكيد برضه في شباب كتير جدا صادق وكويس جدا,
وكمان في حاجه احبك تعرفها المشاعر عمرها ما كانت شغل اطفال لانها ممكن تكون فعلا صادقه
وكمان المشاعر المزيفه سهل جدا تنكشف لانك ممكن تخدع بعض الناس لبعض الوقت لكن طبعا استحاله تخدع كل الناس طول الوقت.

بصى ياملك هوه فعلا فى حب والحب موجود فى كل مكان حولينا بس انا اعتقد ان مفيش حب عن طريق الشات فى رأيى ازاى احب كلام على شاشة او حتى مجرد صوت او صورة لازم الحب يكون مكتمل لازم تعرفى الشخص ده كويس جدا تعرفى هوه ايه عشان تحددى انتى عايزة ايه وتحددى اذا كان ده حب فعلا ولا لا
صديقتك الجديدة سندريلا

اشكرك يا سندريلا على رأيك
وانا بجد سعيده بيكى كصديقه جديده لى

حب النت اكبر غلط اوعى تصدقى غير لما تشوفى بعينك
مش مجرد كلام وبس وحتى انتى بتقولى الحب فعل مش كلام
خلى بالك وفكرى كويس قوى قبل ما تخدى قرار
nourhan

انا مع القائلين باني ممكن تكون هناك حب علي النت
بس لازم الدقه في اختيار الشخص ويكون محل ثقه
مشكوووووووره ملك

ملك انتى مش حبيتيه اصلا كلامك بيقول كده انتى حبيتى التغير اللى حصل فى حياتك كسر الملل. رقه مشاعرك خليتك تحسى انه صادق لكن من جواكى عقلك وقلبك مش قادر يثق بحبه ولا يصدقه. ممكن يكون اتعلق بيكى لكن لو حبك ايه يمنعه من الارتباط بيكى لو ظروفه عبر عن حبه ليه من الاول .ابعدى عنه والغى اى شئ يخصه عندك علشان مش تتضعفى وتكلميه. اما بالنسبه لعدم وجود حب على النت انا معرفش غير ان الحب فى كل مكان موجود لان النصيب ميعرفش نت ولا غيره ده كل ده اسباب لاراده الله علشان النصيب يكون المهم احترامنا لعقلنا ولنفسنا اختيارنا الصح الانسان فكر واسلوب بيوضح من الكلام رؤيه الناس غرضها القبول او لاء. مشكله النت انه للاسف خداع ممكن يتقال كلام والحقيقه غير كده علشان كده بنقول نت لاء لكن زى مافى ناس خداعه فيه ناس صادقه وانتى وعقلك واحساسك .(حاسه ان الحب شئ خيالى بنحلم بيه بس صعب ان الواحد يمارسه)الحب عمره ما كان خيال ده كل الوجود والحب لا يمارس ده احساس يختلف من قلب للتانى ... دعواتى ليكى ان تجدى القلب الذى يجعلك تعيشين دنيا الحب بكل الامان والاحتوااااااء...شكراااااااااا

هو طبعا فى حب بس مش على النت لان النت دة صورة مش كاملة والحب اكبر من انك تكلمى واحد مجرد كلام الحب بيتشاف من التصرفات الحب الحقيقى بيكون ان اللى يحبك يتمسك بيكى ويخاف عليكى ويحارب كل الدنيا والظروف عشان يوصلك ويسعدك من يفضل يتكلم معاكى ويقولك بحبك بس معلش مش هقدر اكمل معاكى لان مفيش نصيب انتى ما ظلمتيش حد ولا حد ظلمك بس لو فضلتى مقتنعة ان مفيش حب كدة فعلا هتظلمى نفسك لان الحب موجود بس للاسف نادر اوى فى الايام دى ربنا يوفقك يارب وتلاقى الشخص اللى تحبية وتوقعى على بوزك وتعرفى ساعتها ان فى حب