الست يسرا.. والست إيناس.. والست مرجانة..!

من الحياة
السيد البابلي
الست يسرا.. والست إيناس.. والست مرجانة..!

نفسي أعرف بيجيبوا الجرأة دي منين.. وإيه الثقة اللي بيتكلموا بيها دي.. ومين اللي بيشجعهم يقولوا كده ويعملوا كده..!
فالست يسرا بتاعة السيما وهي ممثلة ليها أدوار كويسة وأدوار بطيخ... أدوار بتكون فيها ممثلة وأدوار بتكون فيها طبيعية.. وهي دي اللي بتكون فيها كويسة..والست يسرا لما بتتكلم وتقول تصريحات وأحاديث بتكون بقي مش كويسة خالص وخصوصاً لما تدافع عن الغلط لمصلحة واحدة صاحبتها أو واحدة من شلتها..!
فشلة الست يسرا كان فيها الدكتورة هالة سرحان اللي ضيعوها وخلوها تلف العالم بعيداً عن مصر ومش قادرة تنزلها ولا تدخلها وإلا هاتواجه المحكمة وما أدراك يعني إيه المحكمة. يعني سين وجيم ومحامين وأتعاب وشهود وكلام كتير قوي يتقال والداخل للمحكمة دايماً بيكون مفقود والخارج منها برضي مفقود حتي ولو أخد براءة..!
وفي الشلة دي موجودة المخرجة إيناس الدغيدي اللي خرجت علينا يسرا بتصريحات في قناة تليفزيونية بتدافع فيها عن أفلام إيناس وعبقرية إيناس وفن إيناس واحنا بس اللي مش بنفهم ومش عارفين نوصل لرؤيتها الفنية.
والست إيناس كمان ماكدبتش خبر وقالت لافض فوها إنها في الأفلام مابتعملش حاجة غلط ولا ضد الدين والأخلاق.. وكان نفسها الظاهر تقول إن إحنا اللي مش فاهمين الدين ولا حاجة.. إيه يعني الست تطلع في الفيلم عريانة.. ولا فيه واحد غريب بيبوسها.. ده تمثيل والتمثيل مش عيب.. وإيه يعني لما واد مخرج عاوز يشتهر يجيب واحدة تبوس واحدة.. ما هو ده التجديد.. وهي دي الرؤية الفنية.. وهي دي العبقرية زي ما الراجل السيناريست اللي طلع يدافع عن إيناس ويقول إنها عبقرية وسابقة جيلها. واحنا اللي مش قادرين نفهمها..!
وآه يابتوع الهشك بشك لما تقولوا كلام كبير تغرقونا بيه وتضيعونا معاكم.. مش حرام عليكم اللي عملتوه في الشباب ده.. خليتوه يتعلم منكم الغلط ويصدقكم.. مش إنتم اللي في فيلم من بتوعكم علمتوه أن كفاية البنت تقول للواد وهبتك نفسي وبكده يبقوا متجوزين.. أهو النتيجة المجتمع مليان جوازات من النوع المنيل ده.. زنا بشكل جواز سري.. وعلاقات محرمة بمليون شكل ولون.
ومش إنتم في أفلامكم اللي علمتوهم أن البنات لازم تحب.. والبنات لما تحب يعني تروح ديسكو وترقص وتشرب كمان.. ما هو كله في الحب جايز علشان تفوز بالواد بتاعها.. أنتم اللي علمتوهم الجيرل فريند والبوي فريند والبلاوي دي كلها.
مش أنتم اللي بتخلوا الرقاصة في أفلامكم نجمة مجتمع والرجالة بتترمي قدام رجليها.. والرقاصة هي الشريفة والعفيفة والكريمة وبنت البلد والباقي هم الكدابين والنصابين والحرامية والمنافقين..!
أنتم ببساطة نقلتم أمراضكم والعقد بتاعتكم للشاشة. وبتحاولوا تخلوا المجتمع كله يبقي زيكم.. أنتم بتفكرونا بالبنت اللي سلوكها وحش في كل حي واللي لا يمكن ترتاح إلا لما تبوظ وتلوث سمعة بنات الحي كله لو مابقوش زيها.. إنتم عاملين زي اللي جاله الإيدز وعاوز ينقل الفيروس للناس كلها علشان مايكونش لوحده اللي عايش بالعار..!
واحنا مش بنقول مواعظ ولا خطب.. ولا احنا بتوع يمين ولا يسار.. ولا لينا في ده ولا في ده.. احنا بنقول اللي لازم نقوله.. تنتجوا أفلامكم إياها.. آه.. براحتكم.. ونشوفها لأ.. براحتنا برضه.. لكن كمان نسكت.. أهو ده اللي مش ممكن أبداً علي رأي الكبيرة اللي طول عمرها بتقولها الست أم كلثوم اللي خلصت بأغانيها علي كلام الحب كلها.. ومن بعد ما غنت للعمالقة اللي دابوا في الحب فمفيش شاعر ولا كاتب هايقدر يقول أكثر من اللي قالوه واللي غنته أم كلثوم..!
ولأن مستحيل نسكت فإحنا هانقول إن دي مش سيما ولا ده فن.. دي قلة إيما وده انحراف.. وياست يسرا نقطينا بسكاتك أحسن.. وخليكي في التمثيل.. وابعدي عن الست إيناس هانم.. وكفاية الست مرجانة اللي ضاعت وكانت نجمة كبيرة قوي.. ودلوقت بقت فين.. الله يرجعها علي كل حال بالسلامة.. وربنا يهدينا ويهديكم..!
** ملحوظة أخيرة:
إيه اللي حصل للناس...!؟

» ترحيب بالعضو يسرا
» إيناس الدغيدي : لن أقدم مشاهد ساخنة بعد الآن
» يسرا للجزائريين: "عيب عليكم حرق علم
» يسرا من دبي : أنا امرأة بكل معاني الكلمة
» العجوزه المتصابيه إيناس الدغيدي تحلم بترخيص الدعارة قبل أن تموت..