تمارين للجسم المتناسق

أكيد حلم كل بنت هو الحصول على قوام متناسق خالي من أي عيوب ممكن تكون موجودة فيه زي
عدم التناسق وغيرها من المشاكل اللي ممكن إنها تأثر على جمالك

وأكيد بتسألي نفسك وبتقولي يا تري إيه السبب في المشاكل دي كلها؟؟؟

لو فكرتِ بينك وبين نفسك كويس هتلاقي إن السبب الأساسي في ظهور المشاكل دي كلها هو "الكسل والخمول وقلة الحركة" اللي ممكن تكون غصب عنك نتيجة مثلا إن طبيعة عملك بتفرض عليكِ الجلوس لفترات طويلة.. أو إنك مش عندك إمكانيات أو وقت إنك تروحي النادي تعملي تمارين رياضية.

بس إيه رأيك لما تتخلصي من كل المشاكل دي وإنتِ قاعدة في بيتك ومن غير أي مجهود.. كل الحكاية إنك تفضي نفسك كل يوم ولو لمدة نص ساعة ونعمل شوية التمرينات اللي هنقول لك عليها دلوقتي وده لأن زي ما إنتِ عارفة إن ممارسة الرياضة شيء ضروري جدا ومفيد.

بس في البداية
قبل ما نقول لك على التمرينات دي عايزينك تاخدي بالك من شوية الحاجات البسيطة دي:

1- ياريت إنك قبل ما تقومي بممارسة التمارين الرياضية وبعد ما تنتهي من ممارسة الرياضة تعملي تليين لعضلات جسمك.. وده لأن البدء المفاجئ في
التمارين الرياضية أو الانتهاء المفاجئ منها ممكن إنه يعرضك لمشاكل زي حدوث شد في عضلات الجسم أو تشنجات أو حدوث الألم خاصة لو كانت التمارين دي شديدة شوية.

2- احرصي على شرب كمية كافية من المية في الأيام اللي هتعملي فيها تمارين علشان تعوضي جسمك عن فقدانه للسوائل.

3- مش محتاجة إني أقول لك إنك ماتجيش على نفسك زيادة عن اللزوم في التمارين الرياضية علشان ماتشعريش بالإرهاق والتعب بعد فترة قصيرة من بدء التمرين وتكرهي اليوم اللي فكرتِ فيه إنك تمارسي رياضة..

وخليكِ دايما فاكرة..
إن الحصول على الوزن المناسب والجسم الرشيق مش هييجي بين يوم وليلة، ده محتاج وقت وصبر وجهد ومحتاج إنك تلغي من قاموس حياتك كلمة مافيش فايدة أو زهقت ولازم تعرفي حاجة مهمة قوي وهي إن الاستمرار في ممارسة التمارين دي هو شرط النجاح في الحصول على القوام المثالي الخالي من أي عيوب.

تعالي بقى نعمل التمارين مع بعض
يلاّ.. واحد اتنين...

تمرين الوقوف على أطراف القدمين

تمارين للجسم المتناسق Tip_toes

والتمرين ده بيسمى تمرين الوقوف على أطراف القدمين وكل اللي هتعمليه فيه هو إنك تقفي على أطراف قدميك لمدة خمس ثوان مع شد الجسم.. وبعد كده تقفي على رجلك تاني.. وترجعي تكرري الموضوع ده 5 مرات مع مراعاة إن إيدك تكون جانبك وظهرك يكون مفرود.

وعلى فكرة التمرين ده مفيد جدا لأنه بيساعد على شد عضلات الجسم ومنع حدوث ترهلات في الفخدين.

تمرين الأرجـل

تمارين للجسم المتناسق Leg_straighteners

اقعدي على كرسي مع مراعاة فرد الظهر بعد كده مدي رجلك اليمنى للأمام ورجعيها تاني إلى وضعها الأساسي..
كرري التمرين 8 مرات لرجلك اليمين و8 لرجلك الشمال والتمرين ده بيفيد في التخلص من مشكلة الكرش وتخسيس منظقة الفخدين والتخلص من ترهلات الفخدين.

تمرين البطن

تمارين للجسم المتناسق Sit_ups

نامي على الأرض وإيدك جانبك بعد كده اثني رجلك اليمن 8 مرات ورجلك الشمال 8 مرات.. والتمرين ده بيساعد على تقوية عضلات البطن والتخلص من مشكلة ترهلات البطن.

تمرين لشد البطن
تمارين للجسم المتناسق Knee_bend_to_chest

تمارين للجسم المتناسق Knee_bend_to_chest

وده كمان تمرين تاني لشد البطن والتخلص من ترهلات البطن.. كل اللي عليكِ إنك تنامي على وشك وتحطي إيدك ورا وترفعي رأسك بصدرك عن الأرض لمدة خمس ثوان، وتنزليها تاني.. كرري التمرين ده 5 مرات مع مراعاة إن يكون ظهرك مفرود.. ولو عايزة نتيجة أحسن يبقى ياريت تعملي مع التمرين ده تمرين البطن كمان.

تمرين الأرداف

تمارين للجسم المتناسق Bridges

نامي على بطنك وإيدك جانبك وارفعي رجلك اليمين نص رفعة وبعد كده رجلك الشمال.. كرري التمرين ده 5 مرات لكل رجل.. وعلى فكرة التمرين ده هيساعد على التخلص من مشكلة الأرداف نهائيا.

تمرين لتقوية عضلات الظهر

تمارين للجسم المتناسق Head_and_shoulder_lifts

تمارين للجسم المتناسق Head_and_shoulder_lifts

نامي على ظهرك وإيدك جانبك، وبعد كده قومي بظهرك من على الأرض نص قومة لمدة خمس ثوان، ورجعيه تاني على الأرض.. كرري التمرين ده خمس مرات لأنه بيساعد على تقوية عضلات الظهر.

منقــــــــــــــــــــــــــــول

**شرحك للتمارين ممتاز وخصوصا انها مع الصور....
**شكرا نورا........

ميرسى يا نورااااا
على التمارين المفيده واجمل مافيها
ادعامها بالصور
ميرسى يا حبيبتى
ربنا يوفقك

طبعا انا مش بحب التمارين الرياضيه
انتى عارفه
فياريت تشوفيلى حد يساعدنى
زى القمر ده
شاف حاله
ولقا اللى يساعده
نااااااااصح

والله يا نيرفين انا عرفاكى
لو جبت لك عشره من دول
برضو مش هاتعملى التمارين
انتى كبيريك اوى تسقفى
للى بيعملوا التمارين
شكرا يا نيرفنتى على ردك
وشكر ليكى يا جنا
على ردك الجميل
اى خدمه يا بنات اللى نفسها فى
اى حاجه تقولى وانا انزلها فورا
هو احنا لينا غير بعضينا يا بنات Razz

ميرسى يا نوراااااااااااااااااااا

» فوائد النوم للجسم:
» تمارين منزلية بالصور المتحركة
» فوائد الصلاة البدنية العامة للجسم
» تمارين رياضية بالصور
» تمارين ما بعد الولادة بالصور