الدنيا دى زاى الخيارة

الدنيا دية زى خيارة
ناس بتوكتوك وناس بطيارة
وناس بتحلم بالسفارة
وناس غرقانة فى العبّارة
وبواب بيمسح باب العمارة
...وشباب قاعدين بيلفولهم سيجارة
والمحبين قاعدين حيارة
وام احمد بتشتكى من الجارة
واجتماعات مجلس ادارة
عشان يقنعوا مصيلحى بتاع فانتالوب بالامارة
وعسكرى المرور هيموت من الجو والحرارة
فيها ايه لو شغلوا بس الاشارة؟
ومجلس الشعب سيد قراره
مش عارف يتفق او يرسى على اختياره
وفلاح بيجرى على جراره
وابو الليف فجأة بقى فى الصدارة
والمدرسين والدكاترة افقر من بتوع الجزارة
وناس عايشة فى قلب الحارة
حاطين مكان الباب حتة ستارة
وناس عندها فى كل منطقة عمارة
وناس بتربط البنطلون بالدوبارة
و شقتى لسة ع المحارة
بوسترات اغانى على عواميد الانارة
ومستشفيات يقطعوا عنها النور والحرارة
وناس فى الديسكوهات سكارى
وناس من الديون حيارى
والميت كلب والجنازة حارّة
ونسوان مفترية وجبارة
.وبنات عندها الحياء امارة
وموظف يملأ 200 شيك و استمارة
عشان يشترى نصف سيارة
والشوارع اخر اهمال وقذارة
والاخلاق مالت اوى للحقارة
وكريم طول اليوم بيعاكس البت سمارة
وناس مامعهاش تمن السجارة
ومقضياها برشطة واستعارة
والتليفزيون بيعرض شئ اشبه بالدعارة
ان ماكانتش فعلا دعارة
اعلانات جنسية واضحة وكأنها اعلانات عن عطارة
كوسة وفساد وغش من غير امارة
ناخد فيها المركز الاول بكل جدارة
ايــــــــــه! المهم انا هاقوم اصلى استخارة
يمكن افهم ايه العبارة
.وابقوا سلمولى على مصر وزارة وزارة
ولو اتحبحست مستنى منكم الزيارة
.ما هو انا زيكم مليت الاستمارة
ودى رسالة من ا خوك ايهاب اللى على بلده من الغيارى
ونفسى نكون بجد دولة الاصلاح والحضارة
مش كل واحد ماسكله زمارة
ومستنى اندلاع الشرارة

ياااااااااه انت عزفت علي الجرح يا عم ايهاب
لكن افتكر
ما طار طائر وارتفع الا وكما طار وقع

السلام عليكم
ازيك يابو حميد
بالله عليك تعمل معك كوباية شاى معك
بس بلاش سجارة احسن بتتعب معداتى
هههههه

شكرا ايهاب علي الخاطره الميله بس من غير كوبايه شاي او سيجاره

ازيك يا امير انتا موجود ياريت تكلمنى
على الدردشه

شكرا علي الخاطره يا ايهاب