نفسى أبقى ريس

نفسى يا عالم أبقى ريس . . وينكتب لى عمر مديد
يحطوا صورتى فى كل مكان . . وتمثال فى باب الحديد
وكتبة يسبحوا بحمدى . . وملحنبن يعملولى نشيد
شعب يغنى باسمى ويهتف . . عاش الزعيم الفريد
لكن ماشفتش بشاير . . مهما قال سرور ومفيد
كمان قرفت من أنس . . وأسامة وكمال ورشيد

خدت حاشيتى فى طيارتى . . وسافرنا لبلاد بعيد
أجرت خبرا أمريكان . . ودكاترة تلميع من السويد
قلت لهم تنصحونى بإيه . .أرجوكم إدونى رأى سديد
إزاى يا خواجات أتمريس . . وأنفذ فكر ماما الجديد
مهما طلبتم تحت أمركم . . ملايين مليارات بدون تحديد

قالوا ولا يهمك يا جيمى . . بس لازم يكون لشيكك رصيد
ولا أحسن أدينا ذهب . . أو دولار أو يورو كاش فى الإيد
قلت ماشى اللى تقولوه . . بس انتو اطلعوا بالمفيد

قالوا أهرش فى جيبك شوية . . وفرح الغلابة فى العيد
طلع أبوك وأمك عالمعاش . . وبطل تعمل الناس عبيد
وإظهر بمظهر طيب . . وبلاش تعيش بليد
لف بر مصر وبحرها . . وحن أكثر على الصعيد
زور القرى والنجوع . . واوعى تنسى سينا و بورسعيد
واطلع يوماتى عالتليفزيون . . وقول إقتصادنا جامد وشديد
بلاد كثير تانية فلست . . لكن مصر خيرها حايزيد
وظايف على قفا من يشيل . . وقروض وبيزنيس للى يريد
حابنيلكوا شقق بالكومة عشان . . الشباب يتجوز ويبقى سعيد
مخبز فى كل شارع وجمعية . . وكمان عيادة ومكتب بريد
حاغرقكوا لحمة وفراخ وسمك . . ولا يهمكوا كثرة المواليد

عملت كل اللى قالوا عليه . . وقعدت مستنى وحيد
ثمانين سنة عدت وبكرة حايبقى . . واحد وتمانين أكيد
لكن ابدا ، اللى بالى بالك . . لازق فى الكرسى ونازل تمديد

قلت لهم تنصحونى بإيه . .أرجوكم إدونى رأى سديد
إزاى يا خواجات أتمريس . . وأنفذ فكر ماما الجديد
مهما طلبتم تحت أمركم . . ملايين مليارات بدون تحديد

**كلمات معبره اووي ابن حميدو ...
**شكرااااااا ليك ابن حميدو ....