يا مصر يا منوّرة

يا مصر يا منورة قلبى وننى العين
جابك ولادك ورا والا رموكى فين؟
والا انت يا سكرة متقسمة نصين
مليانة بالفشخرة والمرمطة لاتنين؟
***
فيكى شباب "لندرة" فى الحزب مجتمعين
بالعافية والدكترة والمنظرة حاكمين
وفـ كل بيعة ذرة أو قمح مشتركين
حتى الحديد اتهرى والأرض والعازقين
وخلق متكدرة فيكى عيشتها طين
أرزاقها متقطرة ومغيّره الشرايين
غرقانة.. متكسّرة.. متعذّبة.. ولعين
يا مصر كان إيه جرى خلاّنا مفترقين؟
بالهلس والمسخرة والكورة ملهيين
وفـ ساعة المجزرة نزعق على "حطين"
يا مصر كرباج ورا ينزل على الفاسدين
والنصب والسمسرة باسم الشرف والدين
يفتح لهم مقبرة ويسكّها فى الحين